Pages

May 17, 2011

မြတ်ဗုဒ္ဓ

မြတ်ဗုဒ္ဓ လောင်းလျာ မင်းသားကို ဘီစီ ခြောက်ရာစုတွင် လုမ္ဗိနီ ဥယျာဉ်တော်၌ ဖွားမြင်ခဲ့၏။ ဖွားမြင်သည့် နေ့ကား သကျတို့၏ ပြက္ခဒိန်အရ မဟာသက္ကရာဇ် (၆၈) ခု ကဆုန်လပြည့် သောကြာနေ့ ဖြစ်သည်။ ခမည်းတော်မှာ သကျနိုင်ငံတော်၏ အရှင် ဘုရင် သုဒ္ဓေါဓန ဖြစ်ပြီး မယ်တော်မှာ မိဘုရားခေါင်ကြီး မာယာဒေဝီ ဖြစ်ပါသည်။ အနွယ်တော် အမည်မှာ ဂေါတမဖြစ်ပြီး ကိုယ်ပိုင် အမည်မှာ သိဒ္ဓတ္တဖြစ်သည်။

သားတော်လေး ဖွားမြင်တော်မူသည့် အခါ အစဉ်အလာ ထုံးတမ်းဖြစ်သည့် ဘုရင့် ပုရောဟိတ်တို့က နိမိတ် ဖတ်ကြားကြသည်။ ဖတ်ကြားချက်မှာ နှစ်မျိုး နှစ်စား ဖြစ်ပါသည်။ တစ်မျိုးက မင်းသားလေးသည် အရွှယ်ရောက်သည့် အခါ တစ်လောကလုံးကို အစိုးရသည့် စကြာဝတေးမင်း ဖြစ်မည်ဟု ဆို၏။ နောက်တစ်မျိုးကား ဘုရားဖြစ်မည်ဟု ဆိုပါ၏။


ခမည်းတော် မင်းကြီးသည် သားတော်လေးကို တစ်လောကလုံးကို အစိုးရသည့် စကြာဝတေးမင်း ဖြစ်စေလိုပါ၏။ တိုင်းသူ ပြည်သားတို့သည်လည်း အနာဂတ် ဘုရင်မျိုးဆက် ဖွားမြင်လာလို့ ဝမ်းမြောက် ကြည်နူးရသည့်အပြင် ထိုမင်းသားမှာ စကြေးဝတေးမင်းပင် ဖြစ်လာမည်ဆိုသဖြင့် အတိုင်းထက် အလွန်ပင် ဝမ်းသာနေကြ၏။

ခမည်းတော် မင်းကြီးသည် သားတော်လေးအား မင်းသားတို့ တတ်အပ်သည့် အတတ်မျိုးစုံကို အကုန်ပင် သင်ကြားစေ၏။ မင်းသားလေးမှာလည်း ထက်မြက်လှသဖြင့် သင်ပေးအပ်သော ပညာရပ်တိုင်းကို လျှင်မြန်စွာ တတ်မြောက်၏။ တတ်သည့် အချင်းအရာမှာလည်း တစ်ဖက် ကမ်းခတ် တတ်မြောက်မှုချည်း ဖြစ်၏။ နန်းတွင်း ဗြဟ္မဏ ပညာရှိတို့ ဟောကြာချက်မှာ မင်းသားလေး အရွယ်ရောက်လေ၊ ဖြစ်နိုင်ချေ များလာလေဖြစ်၍ ဘုရင်ကြီးမှာ နှစ်လုံး ပျော်မွေ့ သဘောတော် တွေ့နေတော့၏။

သို့သော်လည်း တစ်ခါ တစ်ရံမှာတော့ စိုးရိမ်ရပါသေး၏။ “သားတော် မင်းသားလေး တောထွက်သွားသော်” ဟု တွေးမိချိန်တွင် ယင်းသို့ ခံစားရ၏။ တစ်ဖက်ကတော့လည်း အဲဒီလို တွေးမိသည်ကို ကျေးဇူးတင်ကောင်း တင်နိုင်ပါ၏။ အကြောင်းမှာ မလိုချင်သည့် ဖြစ်လာနိုင်ခြေကို သတိယ တွက်ဆမိသဖြင့် ကြိုတင် ပြင်ဆင်နိုင်သောကြောင့်ပင်။

အဓိက ကြိုတင်ပြင်ဆင်မှုကား သားတော်လေး မည်သည့် ဒုက္ခမျိုး၊ ဆင်းရဲမျိုးကိုမျှ မြင်ခွင့် သိခွင့်မရအောင် ဆောင်ရွက်ခြင်း ဖြစ်သည်။ ဒုက္ခ သုက္ခများကို မြင်တွေ့ရခြင်း မရှိလျှင် တောထွက်ဖို့ရန် အကြံတော် ဖြစ်လိမ့်မည် မဟုတ်။ ထို့ပြင် မင်းစည်းးစိမ်၌လည်း ပိုမို သာယာ နှစ်သက် ပျော်ရွှင်မှုဖြင့် ဖက်တွယ်ပေလိမ့်မည်။ ယင်းသို့ ဖြစ်လာလျှင် ဘုရားဖြစ်ရေးအတွက် တောထွက်ဖို့ ပို၍ပင် ဝေးသွားပေလိမ့်မည်။ တောထွက်ဖို့ ဝေးသွားခြင်းသည် စကြာဝတေးမင်း ဖြစ်ရေးအတွက် နီးလာခြင်းပင် ဖြစ်ပါ၏။ 

ထို့ကြောင့်လည်း နန်းတော်တွင်း နန်းတော်ပတွင် ပိုမို သာယာအေင် စီမံ၏။ စံနန်းဆောင်တို့ကလည်း ရမ္မ၊ သုဘ၊ သုရမ္မဟု သုံးဆောင်ပင် ရှိ၏။ ဥတုသုံးလီနှင့် အလိုက်သင့် အလှည့်သင့် ကိုက်ညီနေအောင် စီမံ ဆောက်လုပ်ထားသည်ဟု ဆို၏။ 

စံနန်းဆောင်တွင်လည်း ရံရွှေတော် မောင်းမ မိဿံတို့ကား အပြည့်။ အားလုံးပင် ချောမောကြ၏။ လှပကြ၏။ ပြေပြစ်ကြ၏။ ရှုမငြီးဖွယ်တွေချည်း ဖြစ်ကြ၏။ သူတို့ကား သွယ်လျှသော လက်ချောင်း ခြေချောင်းလေးများကိုလည်း ပိုင်ဆိုင်ကြ၏။ ကြည်လင် ဝင်းပသော အသားအအရေလည်း ရှိကြ၏။ သေးသင့်ရာ သေး၊ သွယ်သင့်ရာ သွယ်၊ ပြည့်သင့်ရာ ပြည့်၊ မောက်သင့်ရာ မောက်သည့် ခန္ဓာကိုယ် အချိုးအစားမျိုး ရှိကြသည်ချည်းသာ ဖြစ်၏။ 

သူတို့၏ တာဝန်သည် မင်းသားလေး အပျင်းတော် ပြေစေရန် တစ်နည်းဆိုရသော် ငြီးငွေ့မသွားစေရန် အက၊ အလှ တေးဂီတ ပဒေသာတို့ဖြင့် ဖျော်ဖြေပေးရန် ဖြစ်ပါ၏။ ယင်းသို့ ရံရွှေတော်များ ထားခြင်းသည် ထိုခေတ်က နန်းဓလေ့ ထုံးတမ်းဖြစ်သည်ဟု ဘီဘီစီက ထုပ်လွှင့်ခဲ့ဘူးသည့် ဗုဒ္ဓဝင်တွင် ဆို၏။ ခမည်းတော် ဘုရင်ကြီး စီမံထားသည်မှာ သားတော်၏ လောကတစ်ခုလုံးသည် ပျော်ရွှင် ကြည်နူးဖွယ် လောကဖြစ်နေစေရေး၊ ဆွဲဆောင်မှုအပြည့်ရှိသည့် လောကဖြစ်နေစေရေး  ဖြစ်ပါသည်။

ထိုခေတ်ထုံးစံ အရ သက်တော် ဆယ့်ခြောက်နှစ်တွင် ယသောဓရာ မင်းသမီးလေးနှင့် လက်ဆက်၏။ မင်းသမီးလေးသည် လှလည်း လှနိုင်လွန်း၏။ ချောလည်း ချောနိုင်လွန်း၏။ ယဉ်မှုတွင်လည်း မှီသူမရှိ။ သစ္စာတရား ထားရှိမှုတွင် ပြိုင်းဖက် အလျှင်းပင် ကင်း၏။ အထက်က ဆိုခဲ့သည့် ဗုဒ္ဓဝင်တွင် သိဒ္ဓတ္ထမင်းသားသည် ယသောဓရာ မင်းသမီးကို လက်ဆက်နိုင်ရေး ယှဉ်ပြိုင် အနိုင်ယူခဲ့ရပြီး ခမည်းတော်ကြီးမှာကား သားတော်၏ စွမ်းပကားကို ကြည့်ကာ ကြည်နူး ဝမ်းမြောက်လှသည်ဟု ပညာရှင်တို့ ဆိုကြ၏။


မင်းသားသည် သူ၏ နန်းတော်တွင် လို-တ-ရ ဘဝဖြင့် မင်းစည်းစိမ် အလယ်တွင် စံတော်မူနေခဲ့သည်။ ဘုရင် သုဒ္ဓေါဓန မင်းကြီး၏ အကြံအစီသည်လည်း ခုထိ ကောင်းနေဆဲ။ စီမံလုပ်ဆောင်ချက်သည်လည်း အစွမ်းပြ ထိရောက်နေဆဲပင်။ “ဤအတိုင်းသာ ဆိုလျှင်” ဟု တွေးကာ ခမည်းတော်ကြီးမှာ ကြိတ်၍ ဝမ်းသာနေ၏။

သို့သော် လေးသင်္ချေနှင့် ကမ္ဘာတစ်သိန်း ဖြည့်ဆည်း အပ်သော ပါရမီတော်တို့ကား သဗ္ဗညုတ ဉာဏ်တော်ကြီး အတွက် ဆိုသည်ကို မည်သူမျှ မသိကြ။ စိုက်ပျိုးထားအပ်သော ပန်းမာလ်တို့သည် အချိန်တန်လျှင် ပွင့်ကြရိုး၊ သီးပင်တို့သည် သီးကြရိုးပင်။ 

တစ်ခါသော် အပါးတော်မြဲ အမတ် ဆန္နကို ခေါ်တော်မူပြီး ဥယျာဉ်တော်သို့ ထွက်တော်မူ၏။ မထွက်ခင်ကပင် ခမည်းတော်ကြီးက သွားနိုင်ရာ လမ်းတစ်လျှောက် မြင်နိုင်ရာ အရပ်တိုင်းတွင် သန့်ရှင်း သပ်ရပ် လှပစေရန် လုပ်ဆောင်ခဲ့သည်သာ မက၊ သံဝေဂ ရစေနိုင်သည့် သူအို သူနာလို လူတွေကိုပင် ရှင်းလင်းထားခဲ့သည်။ အမြင်မတော်စေမည့် အရာမှန်သမျှကို ရှင်းလင်းစေခဲ့သည်။ သို့သော် မျှော်လင့်သလို ဖြစ်မလာခဲ့ပါချေ။

မင်းသားကား ခရီးစဉ်၏ တစ်ခုသော အရပ်တွင် “သူအို“ကို မြင်ခဲ့လေပြီ။ မမြင်စဖူး အမြင်တော်ထူးရကား ဆန္နအမတ်ကို မေးမြန်းရ၏။ အမတ်သည် အိုခြင်းသဘောကို ရှင်းလင်း လျှောက်ထားသည်။ အလောင်းတော် မင်းသားကား အိုခြင်း သဘောတရားကို လေးလေးနက်နက် စဉ်းစားမိကာ စိတ်နှလုံး တုန်လှုပ် ခြောက်ခြားသွားခဲ့ရလေပြီ။ ဘဝအဆက်ဆက်က ဖြည့်ဆည်း ထုံမွှမ်းအပ်သော ပါရမီတို့ဖြင့် ထောက်ကူထားသည့် သူ၏ သံဝေဂ ဉာဏ်တော်တွင် အိုခြင်းသဘောသည် ကွင်းကွင်း ကွက်ကွက်ကြီး ပေါ်လာတော့၏။ 

နောက်ခရီးစဉ် နှစ်ခုတွင် “သူနာ“နှင့် “သူသေ“တို့ကို မြင်ခဲ့ရပြန်လေရာ တုန်လှုပ် ချောက်ခြားသော စိတ်ထားတို့သည် ဖော်ပြ ပြောဆိုဖို့ ဝေါဟာရ အပိုင်းအခြား မဲ့သွားခဲ့လေပြီ။ ကြင်ယာတော်နှင့်လည်း မပျော်မွေ့၊ မောင်းမ မိဿံတို့၏ အက၊ အလှ၊ တေးဂီတတို့သည်လည်း နှစ်သက်စရာ မရှိ။ နန်းစည်းစိမ် တစ်ခုလုံးသည်ပင် သူအတွက် ဘာမျှ အဓိပ္ပါယ် မရှိတော့။ အရာရာသည် အနှစ် အသား မပါ၊ အကာ သက်သက်သာ ဖြစ်နေခဲ့တော့သည်။

နောက် တစ်ခေါက် ထွက်ကြွခဲ့သည့် ခရီးတွင်လည်း မမြင်စဖူး အမြင်ထူးကို ကြုံခဲ့ရပါသေး၏။ ဤ မမြင်စဖူး ထူးလှသည့် အာရုံသည် သူ၏ စိတ်တော်ကို ပြန်လည် လန်းဆန်းစေသည်။ တက်ကြွစေသည်။ ငြိမ်းချမ်းစေသည်။ ထို့အပြင် မျှော်လင့်ချက် ရောက်ခြည်လည်း တောက်ပစေပြန်ပါသည်။ ယင်းမြင်ကွင်းသည်ကား သစ်ပင်အောက်တွင် ငြိမ်သက် တည်ကြည်စွာ ထိုင်နေသည့် ရဟန်းတော် ဖြစ်၏။ 

ထိုမြင်ကွင်းက ပေးသည့် မျှော်လင့်ချက်အတိုင်းပင် သိဒ္ဓတ္ထမင်းသားသည် တစ်ခုသော ည၏ သန်းခေါင်ယာမ် လူခြေတိတ်ချိန်တွင် ဆန္နအမတ်ကို နောက်တော်ပါ အဖြစ် ခေါ်လျှက် ကဏ္ဍကမြင်းကို စီးကား တောထွက်တော်မူခဲ့သည်။ အချိန်ကောင်းကို ရွေးထွက်ခဲ့၍ နန်းတော်ရှိ လူအားလုံး တစ်ယောက်မျှ မသိကြ။ ဒုက္ခခပ်သိမ်း ကင်းပြတ်ငြိမ်းရာ နိဗ္ဗာန်ချမ်းသာ အတွက် နန်းစည်းးစိမ် တစ်ခုလုံးကို အလွယ်တကူပင် စွန့်ပစ်ခဲ့လေပြီ။ ချမ်းသာကြီးကြီး လိုချင်လျှင် ချမ်းသာသေးကို စွန့်ရမြဲ။ ထာဝရချမ်းသာကို လိုချင်လျှင် တဒင်္ဂချမ်းသာကို စွန့်ရမြဲ။ ယင်းအချိန်၌ နန်းစံသက် (၁၃)နှစ်၊ သက်တော် (၂၉) နှစ်သာ ရှိသေး၏။

အနောမာမြစ် တစ်ဖက်ကမ်းသို့ ရောက်သော် ကဏ္ဍကမြင်းနှင့် အမတ်တို့ကို ပြန်လွှတ်လိုက်သည်။ ရဟန်းအသွင်ယူကာ တရားစကျင့်၏။ ဂင်္ဂါမြစ်ဝှမ်း တစ်လျှောက် ကြွကာ ထိုခေတ်က နာမည်ကြီး ဆရာတို့ထံ နည်းခံကာ ကျင့်၏။ 

ပထမ ဆရာကြီးကား ကာလာမ အနွယ် အာဠာရ ရသေ့ကြီး ဖြစ်၏။ သူကား အာကိဉ္စညာယတနဈာန်ကို ရရှိထားသူပါတည်း။ တရားဓမ္မ သင်ကြားပေးရာတွင် ပါးစပ်လှုပ်ရုံမျှဖြင့် သိဒ္ဓတ္ထမင်းသားသည် ဆရာ သိထားသော တရားအားလုံးကို သိသွား၏။ သိရာတွင်လည်း ခိုင်ခိုင်မြဲမြဲ စွဲစွဲကြီးပင် သိ၏။ ခဏကျင့်ရုံမျှဖြင့် ဆရာ ရထားသည့် ဈာန်ကို ရရှိသွား၏။ ဆရာကို ပွင့်ပွင့်လင်းလင်း မေး၏။ ဆရာကလည်း ဤတရားသည် သူသိမြင်သည့် တရားဖြစ်ကြောင်း ရိုးသားစွာ ဖြေ၏။ နောက် သူနှင့် အဆင့်တူ ရာထူးပေးကာ တပည့်များကို အတူ အုပ်ချုပ်ရန် ကမ်းလှမ်းသည်။ အလောင်းတော်ကား လက်မခံ။ လိုချင်သည်မှာ ဤအရာ မဟုတ်ပါလေ။


ဤဆရာထံမှ ထွက်ပြီး ရာမ၏ သား ဥဒကထံ သွား၍ နည်းခံပြန်၏။ ရှေးနည်းအတိုင်းပင် သင်ပေးအပ်သည့် တရားကို လျှင်မြန် ထက်မြက် စူးရှလှသော ဉာဏ်တော်ဖြင့် တစ်ခဏချင်း သိရှိတတ်မြောက်၍ ဆရာ ရရှိထားသည့် နေဝသညာ နာသညာယတနဈာန်ကို ရရှိလေတော့၏။ ပွင့်ပွင့်လင်းလင်း မေးကြည့်လိုက်ပြန်တော့ ဤတရားသည် ဤ ဆရာကြီး သိထားသည့် အမြင့်ဆုံးသော တရားပင် ဖြစ်နေပြန်၏။

ဆရာကလည်း “သူသိတာကို အရှင် ဂေါတမ သိပြီး အရှင် ဂေါတမ သိတာကို သူသိပါကြောင်း” ဝန်ခံ ရှင်းပြသည်။ “ဤလို သီတင်းသုံးဖော်ကို ရခြင်းကား အရတော်လေစွ”ဟု ဝမ်းမြောက်လှသည်။ ဆရာ့အရာ၌ ထားပေးသည်။ သူ့ဂိုဏ်ကို ရှေ့ဆောင် ရှေ့ရွက်ပြုရန် ကမ်းလှမ်းသည်။ သို့သော် အလောင်းတော်ကား ကမ်းလှမ်းမှုကို ငြင်းပယ်ကာ သစ္စာရှာပုံတော် ခရီး ဆက်ထွက်ခဲ့သည်။ သစ္စာကို ထိုးထွင်း သိမှသာလျှင် ဒုက္ခအပေါင်းမှ ကင်းလွတ်ပြီး သန္တိသုခကို ရပေမည်။ 

ဥရုဝေလတောအုပ်သို့ ဝင်ရောက်ကာ ဒုက္ကရစရိယာ အကျင့်ကို ပြင်းပြင်း ထန်ထန် ကျင့်၏။ မည်သူမျှ တုနှိုင်းမမှီအောင် ကျင့်၏။ တောအုပ်ကား ကြီးလည်း ကြီးမားလှ၏။ နက်လည်း နက်လှ၏။ ခေါင်လည်း ခေါင်လှ၏။ အစပထမတွင် ဤလိုနေရာ၌ နေ၍ တရားကျင့်ရန်သော်လည်းကောင်း၊ ပျော်မွေ့နိုင်ရန်သော်လည်းကောင်း၊ တစ်ပါးတည်း သီတင်းသုံးရန်သော်လည်းကောင်း ခက်ခဲကြောင်းနှင့် လုံလောက်သည့် သမာဓိ မရှိက စိတ်ချောက်ခြားနိုင်ကြောင်း သတိယမိသေးသည်။ သို့သော် စင်ကြယ်သော ကာယကံ၊ ဝစီကံ၊ မနောကံတို့ ရှိသည့် အတွက် ထိုကဲ့သို့သော တော၌နေပြီး တရားကျင့်ရသည်ကို ချမ်းသာကြီးလှသည်ဟု မှတ်ယူတော်မူခဲ့သည်။ 

သို့သော် ခြောက်နှစ်ပတ်လုံး ကျင့်ပါလျှက်နှင့်ပင် အရဟတ္တမဂ်ဉာဏ် သဗ္ဗညုတဉာဏ်တော်ကို မရခဲ့။ မရခြင်းမှာ ကျင့်နည်းမှားနေသောကြောင့် ဖြစ်၏။ နောက်ဆုံးတွင် အစွန်းတစ်ဖက်သို့ ရောက်နေသော အတ္တကိလမထာနုယောဂ အကျင့်ကို ပယ်စွန့်တော်မူကာ မဇ္ဈိမပဋိပဒါအကျင့်ဖြင့် ကျင့်တော်မူလေရာ တစ်ခုသောနေ့၏ -


ညည့်ဦးယာမ်တွင် ပုဗ္ဗေနိဝါသာနုဿတိဉာဏ်
သန်းခေါင်ယာမ်တွင် ဒိဗ္ဗစက္ခဉာဏ်
မိုးသောက်ယာမ်တွင် အာသဝက္ခယဉာဏ်တို့ကို ရတော်မူကာ လောကသုံးပါး အလယ်တွင် ဘုရားစင်စစ် ထင်ရှားစွာ ဖြစ်ထွန်း ပွင့်ပေါ်လာပါတော့သည်။
ယင်းနေ့ကား မဟာသက္ကရာဇ် ၁၀၃ ခု၊ ကဆုန်လပြည့်၊ ဗုဒ္ဓဟူးနေ့ ဖြစ်ပါသတည်း။

ဤဆောင်းပါးဖြင့် ကဆုန်လပြည့် ဗုဒ္ဓနေ့ (Vesak Day)ကို ရိုသေ လေးမြတ် ကြည်ညိုစွာ ပူဇော်ပါသည်။

No comments: