Pages

Feb 25, 2011

အခက်အခဲများကို အောင်မြင် ကျော်လွှားနည်း (၁၀)

သည်းခံခြင်း (ခန္တီ)
အရာရာကို စိတ်ရှည်သည်းခံပါ။ ဒေါသဆိုတာ မိမိကို အမှောင်လွှမ်းတဲ့လမ်းကို ခေါ်ဆောင်သွားတတ်တယ်။ ဒေါသဖြစ်ပြီး အခြားသူများကို အနှောင့်အယှက် ပေးပါက မိမိကိုလည်း နာကျင်စေတာပါပဲ။ ဒေါသဆိုတာ ကိုယ်ကာယကို ချိနဲ့စေပြီး စိတ်ကို ပူပန်စေပါတယ်။ ကြမ်းတမ်းတဲ့ စကားတစ်ခွန်းဟာ လေးကနေ ပစ်လွှတ်လိုက်တဲ့ မြားတစ်စင်းလိုပါပဲ။ အကြိမ်တစ်ထောင် တောင်းပန်သော်မှ ပြန်ရုတ်သိမ်းလို့ မရနိုင်တော့ပါဘူး။ 

အချို့သတ္တဝါတွေက ညမှာ မမြင်ကြသလို အချို့က နေ့မှာ မမြင်ကြပါဘူး။ ဒါပေမဲ့ ပြင်းထန်တဲ့ အမုန်းတရားရဲ့ မောင်းနှင်မှုကို ခံရတဲ့ လူကတော့ နေ့မှာပဲဖြစ်ဖြစ် ညမှာပဲဖြစ်ဖြစ် မမြင်တော့ပါဘူး။

သင် ဒေါသဖြစ်တဲ့အခါ သင် ဘယ်သူနှင့် တိုက်ခိုက်နေတာပါလဲ။ သင် ဘာကို တိုက်ခိုက်နေတာပါလဲ။ သင်ဟာ သင်ကိုယ်တိုင်ရဲ့ အဆိုးဆုံး ရန်သူဖြစ်တဲ့ အတွက်ကြောင့် သင့်ကိုသင် တိုက်ခိုက်နေတာ ဖြစ်ပါတယ်။ စိတ်ဆိုတာ သင့်ရဲ့ အကောင်းဆုံး မိတ်ဆွေဖြစ်ပေမည့် အဲဒီစိတ်ကပဲ သင့်ရဲ့ အဆိုးဆုံး ရန်သူလည်း အလွယ်တကူ ဖြစ်လာနိုင်တာပါပဲ။ နှလုံးပြဿနာအချို့၊ အကြောအဆစ်ဆိုင်ရာ ရောဂါများနှင့် အရေပြားရောဂါများဟာ ကာလရှည်ကြာ မကျေမချမ်းဖြစ်မှု၊ မုန်းတီးစိတ်နှင့် မနာလိုဝန်တိုမှုကြောင့် ဖြစ်တာလို့ ခြေရာခံလို့ ရပါတယ်။ အပျက်သဘောဆောင်တဲ့ အဲဒီလို စိတ်ခံစားမှုတွေက နှလုံးကို အဆိပ်သင့်စေပါတယ်။ အဲဒီလိုမျိုး စိတ်ထားတွေဟာ ရောဂါပိုးကို ခန္ဓာကိုယ်ရဲ့ သဘာဝအလျှောက် ခုခံမှုများကို လျော့ကျစေခြင်းအားဖြင့် ငုတ်လျှိုးနေတဲ့ ရောဂါတွေ ကြီးထွားလာအောင် အားပေးပါတယ်။

Feb 23, 2011

အခက်အခဲများကို အောင်မြင် ကျော်လွှားနည်း (၉)

နိဝါတတရား
နိဝါတတရားဆိုတာ ဖြစ်နေတာနှင့် ဖြစ်ဦးမည့်အရာတွေ ကြားမှာရှိတဲ့ ခြားနားမှုကို သိဖို့ရန် ပညာရှိရဲ့ တိုင်းတာစရာ ကြိယာ ဖြစ်ပါတယ်။ ဗုဒ္ဓရှင်တော်မြတ်ကိုယ်တော်တိုင် မိမိကိုယ်ကိုယ်မိမိ နှိမ်ချတဲ့ အနေနှင့် ကိုယ်တော်မြတ်၏ မင်းသွေးမင်းမာန်များကို စွန့်ပစ်ကာ သာသနာပြုအလုပ် တာဝန်များကို စတင်တော်မူခဲ့ပါတယ်။ ကိုယ်တော်မြတ်ဟာ အရဟန္တအဖြစ်သို့ ရောက်ရှိတော်မူခဲ့သော်ငြားလည်း ပင်ကိုသဘဝ ကင်းလွတ်တော်မူမသွားခဲ့သည့် အပြင် ထောင်လွှားသည့် လေသံမျိုးလည်း ရှိတော်မမူခဲ့ချေ။ ရှင်တော်မြတ်၏ ဒေသနာတော်များ၊ ပုံဆောင်တရားတော်များမှာ ကိန်းကြီးခမ်ကြီးနိုင်ခြင်းမျိုး အလျှဉ်းမရှိပါချေ။ အညတရအဖြစ်ဆုံး လူများအတွက်ပင်လျှင် ရှင်တော်ဗုဒ္ဓ အချိန်ပေးတော်မူခဲ့ပါသည်။ ဟာသဥာဏ်တော်လည်း ပျောက်ကွယ်သွားခြင်း အလျှင်း မရှိပေ။

အချိန်မဖြုန်းပါနဲ့
 လူတစ်ယောက်ရဲ့ ဘဝကို အနာဂတ်အကြောင်း တွေးပူပြီး အချိန်ဖြုန်းတာ၊ အတိတ်ကို တန်းတ ပူပန်ပြီး အချိန်ဖြုန်းတာ၊ ပျင်းပျင်းရိရိ မေ့မေ့လျော့လျော့ အချိန်ဖြုန်းတာတွေဟာ ကမ္ဘာမြေပေါ်က အကောင်းဆုံး သတ္တဝါအဖြစ် ရထားတဲ့ မြင့်မြတ်တဲ့ နေရာအတွက် သင့်တော်မှု မရှိဘူးဆိုတာကို ပြတာပါပဲ။ သူနှင့်ထိုက်တန်တဲ့ နေရာကို အဆင့်လျှော့ချပေးမည့် မကောင်းတဲ့ကံကို ဒီနည်းဖြင့် ဖန်တီးပါလိမ့်မည်။ ဒါကို စိတ်ထဲမှာ မှတ်ထားပြီး အသက်ရှင်စဉ် ကုသိုလ်ကောင်းမှု ပြုလုပ်ပါ။ အချိန်ဖြုန်းခြင်းဖြင့် သင့်ကိုယ်သင်သာ ဒုက္ခဖြစ်စေသည် မဟုတ်၊ သင့်အချိန်သည် သင်ပိုင်သလို အများအားဖြင့် သူတစ်ပါးအချိန်လည်း ဖြစ်နေရကား သူတစ်ပါးကိုလည်း ဒုက္ခပေးပါသည်။

Feb 21, 2011

အခက်အခဲများကို အောင်မြင် ကျော်လွှားနည်း (၈)

တစ်ဘက်စောင်းနင်း ကင်းပါစေ
သင်စိတ်ဆိုးနေတဲ့အခါ သို့မဟုတ် ရန်စခံနေရတဲ့အခါ ဘယ်ကိစ္စမှာမဆို အလျှင်စလို ဆုံးဖြတ်ချက် ချတာမျိုး မလုပ်ပါနှင့်။ အဲဒီလိုအခါမျိုးမှာ ချမိတဲ့ မည်သည့် ကောက်ချက် သို့မဟုတ် ဆုံးဖြတ်ချက်မဆို တစ်နေ့မှာ သင် ဝမ်းနည်းစရာကိစ္စမျိုး ဖြစ်လာတတ်တယ်။ ပထမဆုံး သင့်စိတ်ကို တည်ငြိမ်ခွင့်လေး ပေးပါ။ အဲဒီလိုဆိုရင် သင့်ဆုံးဖြတ်ချက်က ဘက်မလိုက်တဲ့ (တစ်ဘက်စောင်းနင်း ကင်းတဲ့) ဆုံးဖြတ်ချက် ဖြစ်ပါလိမ့်မည်။ 

သည်းခံခြင်းကို ပြုစုပြိုးထောင်ပါ။ အကြောင်းကတော့ တစ်ခြားလူတွေရဲ့ ဒုက္ခသုက္ခတွေကို ကိုယ်ချင်းစာဖို့ ကူညီတတ်လို့ပါ။ မလိုအပ်ပဲ ဝေဖန်တာမျိုးကို ရှောင်ကြဉ်ပါ။ အတော်ဆုံးလူသည်ပင် အမှားမကင်းနိုင်ဘူးဆိုတာကို နားလည်သဘောပေါက်အောင် ကြိုးစားပါ။ တစ်ပါးသူမှာ တွေ့ရတဲ့ အားနည်းချက်မျိုးကို သင့်မှာလဲ တွေ့ရနိုင်တာပါပဲ။ အဲဒါကိုပဲ ဖန်အိမ်ထဲမှာ နေနေစဉ် သူများကို ခဲနှင့် မပစ်ပေါက်ပါနဲ့လို့ ပြောကြတာပဲလေ။

(Ven. K. Sri DhammanandaHow to Overcome Your Difficulties ကို ဘာသာပြန်ခြင်းမှ အဆက် ဖြစ်ပါတယ်)။

ဘုန်းဥာဏ်